لن نصمت ... مطلبنا العدالة..تاجيل جلسةالنطق بالحكم

تعديل: تأجيل جلسة الحكم الي يوم 25 / 3 / 2008 .......لن اقول اكثر مما قيل ولكن ساسرد في عجالة بعض الجمل والعناوين التي لها دلالاات خاصة

وسط حضور 4000 متضامن .. التأجيل لمدة شهر للمحاكمة العسكرية

هيئة دفاع "العسكرية": قرار التأجيل سياسي ولا علاقة له بالقضية

إدارة السجن تم إبلاغها بالتأجيل ولم يخرج الإخوان المعتقلون للمحاكمة من الأصل وبقوا بسجنهم

............................................................................................

غدا الثلاثاء جلسة النطق بالحكم في القضية المحالة الي القضاء العسكري والتي يحاكم فها 40 قياديا من قيادات الإخوان المسلمين منهم علماء وأساتذة جامعات ورجال اعمال ..
غدا سوف ينطق القاضي بكلمة سيتحدد علي اساسها مصير 40 عائلة عاشت اصعب لحظات في حياتها علي مدار عام كامل وندعوا الله ان تكون هذه الكلمة كلمة حق
بكلمة واحدة سيتحدد مصير 40 إصلاحيا كانو يريدون الخير لوطنهم ولأمتهم
يارب ... قد جاوز الظالمون المدي ... يارب أنت تعلم أنهم أبرياء وما سجنو الا دفاعا عن الحق في وجه المفسدين الظالمين
يارب كن معهم ... يارب ثبتهم ..يارب انصرهم
لن نصمت ...مطلبنا هو العدالة
كونو معنا غدا الثلاثاء 26/2/2008 في الهايكستب

وثيقة الذل والمهانة..انتكاسة جديدة لحرية الاعلام

كنت بتفرج علي التليفزيون انبارح وفوجئت ببرنامج البيت بيتك جايبين معالي الوزير السيد أنس الفقي وهو بيدافع بقوة عن رأيه وموقفه من وثيقة الإعلام العربي ومحمود سعد أحرجه اكتر من مرة ولكن باين ان الناس دي مبتحسش

اولا السيد انس الفقي من أول ما تولي وزارة الإعلام وهو بيحاول بقدر الإمكان يجمل ويحسن من صورة التليفزيون المصري أمام الناس وده كان واضح قوي في الشكل الجديد والطريقة الجديدة للبرامج والأخبار والمدقق جدا يلاحظ ان في تشابه كبير بين الأسلوب ده واسلوب الجزيرة

أو علي وجه الدقه( تقليد )فعلا وبالنص من أول برنامج صباح جديد واللي بيقلدو فيه برنامج الجزيرة بانهم يعرضو الغريب والمثير وقضايا المواطن وينزلو الشارع يسالو الناس او يستضيفو متخصصين في أمور معينة زي التغذية أو رعاية الأطفال او يناقشو موضوع سياسي وبرضه بنفس اسلوب الجزيرة لغاية الأخبار حتي يا اخي وصل التقليد الي انهم لما يستضيفو حد بيقعدو في استوديو خارجي ووراه النيل مباشرة اللي كل متعودين نشوفها في الجزيرة طب الجزيرة بتعمل كده علشان هيا في قطر لكن انتو بتعملو كده ليه ملقتوش مكان في الإستوديو تقعدو الراجل فيه

المهم ما علينا وبعد التقليد ده واضح ان السيد انس وجد ان برضه نسبة المشاهدة للقنوات المصرية منخفضة فحب انه يحجم دور القنوات الفضائية ويقيد حريتها علشان تبقا نسخة طبق الأصل من الاعلام الحكومي .. وعلي فكرة هو اللي طرح الفكر دي ودعا لعقد قمة استثنائية لوزراء الإعلام العرب وطبعا وزراء الإعلام العرب ما هيصدقو دول يتمنو ما هو الحال من بعضه مفيش غير قطر الوحيدة اللي اعترضت
وللاسف بقيت وزراء العرب وافقو عليها ...واللي يغيظك اكتر من كده ان العقوبات تفرض علي اللي يتعرض للرؤساء والزعماء والقادة بكلام مش ولا بد شوف يا اخي.. ده أمريكا اللي هي اقوي دولة في العالم معندهاش الكلام ده وبوش مش بينتقدوه بس لأ دول بيشتموه وبيتريقو عليه ..لكن احنا لأ ازاي ..ده القائد والزعيم يخليهولنا ويخلي كل الزعماء والقادة.

وثيقة الذل والمهانة دي اللي عايزين يكممو بيها افواه الاعلام الحر لازم كلنا نعترض عليها ونقول لأ .

لا لوثيقة الذل والمهانة (الإعلام العربي)
وعلي فكرة انا اتوقع ان الخطوة الجاية هتبقا علي مواقع الإنترنت والمدونات لأن دي هيا وسيلة الإعلام اللي هتبقا فاضلةوهما مش عايزين حد يعملهم صداع في دماغهم