اسف جدا يا جماعة بقالي كتير مكتبتش وده مش بايدي الشغل اللي انا فيه دلوقتي مفيهوش نت ودي مشكلة مواجهاني وعلشان اكتب لازم اقعد في سيبر
بس ان شاء الله الاقي حل قريب ..كنت عايز اتكلم النهاردة في موضوع بجد لاحظته في الفترة الأخيرة بسبب ان انا بركب مواصلات كتير في الفترة الأخيرة فبقيت اقعد وابص في وشوش الناس بلاحظ حاجات كتير قوي ..بجد مبهزرش
حاول تركب اي مواصلة من اتوبيس لمتروس لميكروباص وبص في وشوش الناس هتلاحظ حاجات غريبة قوي ...هتشوف هموم الدنيا علي وشوشهم ..الناس كلها سرحانة ..اللي حاطط ايده علي خده...واللي سارح في اللاشئ ..واللي قاعد يفكر بس كلهم بيشتركو في حاجة واحدة قسمات وشوشهم وتعبيراتها تقريبا واحد باين عليها الحزن والهم
وقليل جدا لما تلاقي حد بيضحك او مبسوط .
أما بقا لو ربنا كارمك وعندك عربية فاكيد اكيد دمك اتحرق قبل كده بسبب ماشي في الشارع س..لأن الناس بتمشي سرحانه لدرجة ان العربية بتبقا خلاص بينها وبينهم امتار والراجل عمال يضرب كلاكسات وصاحبنا ولاهنا
والله مرة كنت راكب مع واحد صاحبي وفي واحد كان بيعدي الشارع صاحبي قعد يديلو كلاكسات حوالي 4 أو 5 مرات والراجل ولا كانه سامع حاجة وفين وفين لما انتبه
ياتري ده سببه ايه ؟؟
أكيد هتتفق معايا ان الأوضاع الإقتصادية في البلد لا تسر عدو ولا حبيب ..والأوضاع السياسية أنيل وأنيل
ياتري هيجي علينا اليوم اللي هنشوف فيه بلدنا في مقدمة الدول المتقدمة..ياتري هيجي اليوم اللي هنلاقي بلدنا فيه صرح للديموقراطية والمواطن فيه ليه كرامة
ياتري؟؟
ولو جه اليوم ده هيبقا في حياتنا ولا في حياة اولادنا ولا حياة احفاد احفادنا ؟؟؟
ياتري؟؟
هناك ٣ تعليقات:
خليك متفائل .. إيه التشاؤم اللي انت عايش فيه دا
أحفادنا إن شاء الله :)
ههههههههههه
لا وانتا الصادق أحفاد أحفادنا
nzxدعوة للتفاؤل... يارب نكون متفائلين اكتر من كده ..
رغم انى بعانى معاناه من السرحان ده
... بس بردو هنتفاؤل
جزاكم الله خيرا على البوست
إرسال تعليق