أولا: و قبل اي حاجة عايز اقولكم كل سنة وانتو طيبين وبجد بجد وحشتوني ..
بس أعمل ايه الدنيا مشاغل لكن انا اخدت قرار مع نفسي اني موقفش تدوين مهما حصل لكن ممكن اتاخر شوية عليكو في التدوين
ثانيا : مش عارف أبدأ ازاي لأن التدوينة دي مختلفة شوية ، يمكن علشان متعودتش أتكلم عن حياتي الشخصية أو عن اللي بحس بيه واللي في قلبي الا لناس معينين وهم قلة لكن حبيت اتكلم معاكم من باب الفضفضة وكمان من باب وأما بنعمة ربك فحدث
عايز اقولكم اني فرحان جدا ومبسوط خالص لأن حسيت اني بدأت اتغير بعد رمضان وبادعي ربنا ان التغيير ده يستمر وان ربنا يثبتني وبجد والله اناكنت فرحان جدا في رمضان ده مش لأن معدل العبادات زاد لكن لسببين:
السبب الأول :اني حسيت ان في خير كتير حوالينا وان استجابة الناس كانت قوية اوي وإن الشباب بدأ يرجع تاني للمسجد وده كان واضح في أماكن كتيرة روحتها
السبب التاني:اني أيقنت ان التغيير بيبدأ من القلب ولو القلب اتأثر صدقني حياتك كلها هتتغير انا حصل معايا موقف في اخر رمضان أثر في قلبي قوي وخلاني أتاثر باي كلمة أو أي آية اسمعها وده كان تاثير بسيط والله لكن كان شعوره اكثر من رائع عليا وغير طريقة تفكيري لأن عادة الناس بتبقا مهتمة بكثرة العبادات أكتر من اهتمامها بتأثر القلب بالعبادة يعني ممكن تلاقيه حريص جدا علي انه يختم القرآن أكتر من مرة لكن مبيحاولش يشوف تاثير العمل ده علي قلبه ايه وهل حس بخشوع او تأثر أو تدبر في القراءة، وهو ده المحك العملي .
علشان كده لازم الإنسان يركز مع قلبه قوي ويحاول يستحضر خشوع القلب لأن تأثر القلب هو المغزي من العبادة ، وليا طلب عندكم عايزكم تدعولي الفترة دي لأني محتاج دعائكم جدا
هناك ٣ تعليقات:
عودا حميدا يا مولانا
وكل سنة وانت طيب وعلى طول في عالم التدوين كده
تحياتي
نفس الأحاسيس تنتابني واللهِ، سبحان الله
ربنا يكرمك ويثقل ميزانك بالحسنات
اللهم تقبل منه ومنا صالح الاعمال
ربنا يوفقك ويصلح لك امرك ويفرج همك
اللهم امين
إرسال تعليق