استوقفني اليوم مشهد لن انساه ما حييت ..كان اليوم هو ختام دورة التربية العسكرية ادينا الإمتحان وغدا النتائج باذن الله...ولكن المقدم المسؤل عن الدورة قرر أن يجلس معنا جلسة أخوية نساله عما يجول في نفوسنا ...تعددت الأسئلة ما بين سائل عن احوال الجيش المصري وقدرته الدفاعية وهل يستطبع صد هجوم ام لا ؟ وبعض الأسئلة الأخري التي اثارت الضحك في نفوسنا عن امكانية ان يقوم الجيش بقلب لنظام الحكم ..ولكن صدمنا جميعا ما قاله احد الطلاب ..فقد وصلت ورقة للمقدم فحواها يقول :
أنا مش بحب مصر..مبقتش اشعر بالإنتماء ليها ..أنا زهقت من الفساد والظلم اللي فيها ..وكل يوم بتمنا ان امريكا واسرائيل تدك مصر وتحتلها
بغض النظر عن رد فعل الطلاب المستنكر او عن ردود افعالكم وما يجب ان يكون .. تسائلت بيني وبين نفسي كم واحد في هذا الوطن أحس بمرارة الظلم والإضطهاد والفساد ...وكم واحد لم يعد يشعر بالإنتمماء لبلده ولوطنه مصر ..وكم واحد يتمني لو عرض عليه عرض للعمالة لصالح اسرائيل او أمريكا وكم منا يتمني ان تحتل اسرائيل مصر
بالله عليكم اجيبوني ....هل احنا لسه بنحب مصر؟
هناك ٨ تعليقات:
انا لسة بحب مصر بالرغم اللي فيها
و بنتمي ليها جدا
لان ببساطة الفساد و اللي بيحصل فيها بسبب الفاسدين و بياعين الضمير اللي فيها لكن هي مالهاش ذنب ف كل دة
و لو كل واحد قال كدة او كل شاب ساب البلد و هاجر يبقى هانسيبها لمين
هانسيبها للفاسدين يشبعوا من خيرها؟؟؟؟
بصراحة لو كل واحد حوّل الظلم اللي بيشوفه فيها دة لطاقة ضد الفساد و لمحاولة لكشف و ايقاع المرتشين و الفاسدين اللي باوظوها
البلد دي هاتكون ساعتها حاجة تانية خالص
و في حاجة كمان
لو كل واحد سال نفسه ليه ربنا خلاه من البلد دي
يمكن ساعتها هايقدر يعرف ايه اللي ممكن يعمله ليها و ايه اللي يقدر يصلحه فيها
و يمكن اصلاحه دة هو اللي هايثقل له ميزان حسناته
و ف الاخر على راي جاهين
على اسم مصر
التاريخ يقدر يقول ما شاء
انا مصر عندي
احب و اجمل الاشياء
باحبها بعنف
و برقة و على استحياء
و اشتمها و العن ابوها
بعشق زي الداء
و اهرب و اسيبها
ف درب و هي ف درب
و تلتفت تلاقيني
جنبها وقت الكرب
و شكرا للمدون احمد ابو الفتوح
صاحب هذه المدونة الرائعة
للأسف .. لسه بحبها
وبقول للأسف لأني لو مش بحبها كان هيبقى أريح لي بكثـيــر
أنا لسه بحب مصر يا جماعة
بس اللي حاسو ان في شباب كتير بدأ يفقد انتمائه للوطن
ودي مصيبة كبيرة
ربنا يستر..
انا لسه بحب مصر
مش لانها ام الدنيا ولا كل الكلام ده
لانها بلدى بحبها بحلوها ومرها
وان كان فى فساد فى مصر فاحنا اللى عملناه
وكلنا بلا استثناء لينا ذنب
كل واحد يدور على ذنبه ويصلحه وان شاء الله احوالنا تتغير للاحسن بنسبه كبيره
طبعا بحب مصر ومهما حصل هحب مصر
الاب قد يقسو على اولاده والام قد تعاقبهم
ويظلو محبوبين لدى الابناء
بحبك يا مصر
انا الفارس انا الحارس
رايات النصر
انا البادي انا الهادي
انا الفاهم لغات العصر
انا بايدي
افرد كل تجاعيدي
وأجَرّي الدم
ف وريدي
ويوم حُزني
كده باذني
فجأة
يبقى يوم عيدي
ما انا اصلي
فارس اصلي
وليا مع الفوارس
عمر
واذا ماتت
كل الخيول مني
ولو حتى
سيفي تاه عني
هكون دايما
انا الفارس
لآخر العمر
ماهو الفارس
لازمله كمان
شوية صبر
وانا معاكي
وجواكي
بسافر فيكي
عشان ليكي
يكون الفخر
يا بلدي...
حبيبتي يا مصر
مصري ابن مصري وليا الشرف
برغم المهانه ورغم القرف
برغم الزباله الي ماليه الشوارع
برغم الفساد الي بيه اعترف
برغم المجاعة الي داخلين عليها
وفينا الي عايش حياته في ترف
برغم البطاله في اوضة وصاله
برغم ان آخر جنيه اتصرف
انا بحبك يامصر
إرسال تعليق